الحلم الجميل

تاريخ التسجيل : 15/01/2011

الحـــلم الجميــل

أعتذر يابنت برحل وإسمحي لي بالرحيل

هالمسا ذابت ضلوعي والمشاعر تحتضر

يادفا برد الليالي ونشوة الحلم الجميل

طاح حلمي اللي رسمته في غرامك وإنكسر

هالمسا صمت الحنايا ثار يصرخ مستحيل

كيف ذاك الحب كلّه في ثواني يندثر

كيف عمري اللي رخصته للغلا وأغلى خليل

ترخص أيامه وترحل في شقى حبك هدر

مات ذاك اللي جمعنا هالمسا وأضحى قتيل

هذا هو جثمان حبك والحنايا له قبر

جبّت لك أصغر عروقي للغلا نبض ودليل

يمكن إحساسك يصدّق بعّدها إنه خسر

إيه خسر حب كبير وافي ماله مثيل

إيه خسر قلب تمنّى من بساتينك زهر

أعتذر ماجيت أعاتب.. للعتب مافيني حيل

بس جيت أهديك دمع من هدب عيني إنحدر

أدري إن الدمع يفضح صاحب القلب الأصيل

والمصيبه إن قلبي ماله عالفرقى صبر

دمعة الفرقى مريره صدّقي لمّا تسيل

ودمعتي تجرح عيوني..بس يامقسى القدر

من عرفني يعّرف إني صاحب البال الطويل

ويعّرف إني طول عمري شايل هموم وكدر

ماهقيت إن المشاعر ترتجي جود البخيل

لين شفت القلب يطلب من سحب حبك مطر

قلب عالعزه تربّى عمره مايصبح ذليل

والمذله صدّقيني مالها بقلبي مقر

ماهي من عادة خفوقي يطلب إحسان وجميل

ولا أنا منهو يدوّر للعطا وقت وعذر

يوم أنا أعطيت عمري بالوفا شفته قليل

كيف عاد اللي تمنّع بالغلا يعطي شهر

المحبه لو تلامس عالي النخله تميل

كيف قلبك هالمحبه خلّت إحساسه حجر

البحر من فيض حبي صار مثل السلسبيل

والغريبه كان حبك مالح مثل البحر

لا تظني الغدر ممكن للوفا يصبح بديل

ماهو قلبي اللي يبدّل هالغلا زيف وغدر

ضاع عقلك صدّقيني بين قال وبين قيل

وغرّتك دنيا الأماني والهدايا والشعر

صار قلبك وين ماراحت به الألسن يميل

لين صارت في عيونك قيمتك تسوى عشر

الغرور اللي تملّك نشوة إحساسك دخيل

كان قلبك مثل طفل في عباراته طهر

الدهر لاشك إنه ياشقى قلبي كفيل

يفتح عيونك على اللي فيك سوّاه الدهر

هذي هي أسباب بعدي والتجافي والرحيل

إكتشفت إن المشاعر في غرامك تحتضر

أعترف إنك بعمري كنتي لي حلم جميل

بس حلمي في غرامك هالمسا شوفي إنكسر

الموضوع الاصلي : الحلم الجميل المصدر : منتديات الرومانسي

المسافر البعيد ; توقيع العضو